Sigurður Atli hættir hjá Kviku

Sigurður Atli Jónsson, forstjóri Kviku fjárfestingabanka, hefur tilkynnt stjórn fyrirtækisins ákvörðun sína um að láta af störfum. Þetta kemur fram í tilkynningu frá bankanum. Sigurður Atli hefur verið forstjóri Kviku frá 1. júlí 2011, en bankinn hét þá MP banki.

„Sigurður Atli leiddi samruna MP banka og Straums árið 2015. Samruninn tókst framar öllum vonum á þessum tíma undir stjórn og leiðsögn Sigurðar Atla. Nýr, sjálfstæður og sérhæfður fjárfestingabanki varð til undir nafni Kviku,“ segir í tilkynningunni. 

„Það er ánægjulegt hve vel hefur tekist til að búa til nýjan íslenskan banka. Þróun hans hefur tekist einstaklega vel. Einstakur árangur bankans grundvallast á skýrri framtíðarsýn um að vera sjálfstæður og sérhæfður fjárfestingabanki, samþættri stefnulegri áætlun, skipulegri uppbyggingu fyrirtækjamenningar og umfram allt frábæru starfsfólki," segir Sigurður Atli.