Hagnaður Advania nam 173 milljónum króna

Heildartekjur Advania á Íslandi námu 6.078 milljónum króna á fyrri hluta þessa árs og hækkuðu um 5,3% prósent milli ára.

Þetta kemur fram í tilkynningu frá fyrirtækinu. Segir að EBITDA hafi numið 527 milljónum króna og aukist um 45 prósent frá sama tímabili í fyrra. „Þá hækkaði EBITDA hlutfallið úr 6,3% í fyrra í 8,7% nú. Hagnaður félagsins á fyrri hluta ársins ríflega þrefaldaðist milli ára og nam 173 milljónum króna. Hagnaður félagsins á fyrri hluta ársins ríflega þrefaldaðist milli ára og nam 173 milljónum króna,“ segir í tilkynningunni.

Haft er eftir Ægi Má Þórissyni, forstjóra Advania, að rekstur félagsins hafi gengið mjög vel á fyrri hluta árs og að allar helstu kennitölur séu sterkar. „Tekjuvöxturinn er sérstaklega ánægjulegur, ekki síst í ljósi þess að hluti teknanna er í erlendri mynt og gengisþróun á tímabilinu var óhagstæð. Eftirspurn eftir okkar þjónustu hefur aukist mikið og við sjáum fram á áframhaldandi vöxt, enda horfa öll stærri fyrirtæki til upplýsingatækninnar í auknum mæli til að efla sinn rekstur, auka skilvirkni og styrkja sig á samkeppnismarkaði. Í því felast mikil tækifæri fyrir okkur,“ segir Ægir Már.

Starfsmenn Advania á Íslandi eru 600 talsins, en félagið er hluti af Advania samstæðunni sem er með starfsemi á yfir tuttugu stöðum á Norðurlöndum.