Vinsældir Smáralindar aukast í kaupgleðinni

Aðsókn gesta og viðskiptavina Smáralindar jókst um 31 prósent í september, miðað við sama mánuð í fyrra, og 24 prósent í október eða fyrstu mánuðina eftir opnun fatarisans H&M. Framkvæmdastjóri verslunarmiðstöðvarinnar finnur fyrir mikilli aukningu í kaupgleði landans.

Fasteignafélagið Reginn, eigandi Smáralindar, kynnti í gær uppgjör sitt fyrir fyrstu níu mánuði ársins. Þar segir að samkeppnisstaða verslunarmiðstöðvarinnar hafi gjörbreyst með komu H&M í lok ágúst og opnun á nýrri tískuvöruverslun Zöru. Árið hafi einkennst af miklum fjárfestingum vegna breytinga í húsinu og leigutekjur því verið lægri en áætlað var og rekstrarkostnaður hærri á stórum hluta hússins. Nú sé útlit fyrir að tekjur muni aukast umfram fyrri spár.

„Við finnum að verslun í Smáralind hefur verið að glæðast sem er mjög jákvætt og leigutakar mjög ánægðir með breytingarnar. Þessi aukna aðsókn er í samræmi við okkar væntingar og við vissum að með öflugu akkeri myndi hún aukast," segir Sturla Gunnar Eðvarðsson, framkvæmdastjóri Smáralindar.

Stóraukin netverslun og gjörbreytt kauphegðun nýrrar kynslóðar eru risavaxnar áskoranir fyrir verslunarmiðstöðvar, eins og kom fram í Markaðnum, fylgiriti Fréttablaðsins um viðskipti og efnahagsmál, í lok ágúst. Á sama tíma spáir Hagstofa Íslands, í nýrri Þjóðhagsspá sem birtist í gær, því að einkaneysla verði enn meiri á þessu ári en í fyrra þegar hún jókst um 7,1 prósent. Hún muni aukast um 7,8 prósent, eða meira en á árinu 2007, og kaupmáttur halda áfram að aukast.

Sturla Gunnar svarar aðspurður að kærkomið hafi verið að utankjörfundaratkvæðagreiðsla á höfuðborgarsvæðinu fyrir alþingiskosningarnar 2017 hafi verið haldin í Smáralind. Þar kusu um 23.200 manns en Sturla bendir á að 30 þúsund hafi mætt á miðnæturopnun Smáralindar síðasta miðvikudag.

„Utankjörfundaratkvæðin voru mikilvæg í sjálfu sér en einungis dropi í hafið. Í síðasta mánuði komu um 400 þúsund manns hingað. Við sjáum svo stærri daga í húsinu en það er töluvert meira að gera hér fyrir jólin en miðnæturopnunin var mjög stór dagur," segir Sturla Gunnar.