Annar kajakræðaranna látinn

Annar kajakræðaranna sem bjargað var úr sjónum við ós Þjórsár í gærkvöldi er látinn.

Þetta kemur fram í tilkynningu frá lögreglunni á Suðurlandi. Þar segir að ekki verði, að svo stöddu, greint frá nafni hans. Rannsóknardeild lögreglunnar á Suðurlandi fer með rannsókn málsins.

Björgunarsveitir af Suðurlandi og Vestmannaeyjum auk sjö sérhæfðra björgunarsveitarmanna af höfuðborgarsvæðinu og tóku þátt í víðtækri leitaraðgerð að tveimur kajakræðurum við mynni Þjórsár í gær eftir að tilkynning barst klukkan 21.13 um tvo menn í vandræðum á kajökum í briminu við ósinn.

Þyrlur Gæslunnar, björgunarsveitir, sjúkralið og lögregla fóru þegar á staðinn. Þegar björgunarlið kom á vettvang sáust kajakarnir á hvolfi austan við ósinn. Voru björgunarsveitir í sambandi við annann manninn og komu þyrluáhafnirnar auga á mennnina í briminu, vestan við ósinn.

Það tókst að hífa annan manninn upp í aðra þyrluna og hinn síðar í hina þyrluna. Flogið var með mennina á bráðamóttöku Landspítalans í Fossvogi.