Skaginn 3X og Fisk Seafood semja um búnað fyrir Drangey

Fyrirtækin Skaginn 3X og Fisk Seafood á Sauðárkróki hafa skrifað undir samning um vinnslu- og lestarbúnað fyrir nýja skipið Drangey SK2. Skipið var sjósett í Tyrklandi í síðustu viku og er væntanlegt til landsins síðla sumars. Samningurinn var undirritaður á sjávarútvegssýningunni í Brussel í dag.

Vinnslubúnaðurinn sem um ræðir byggir á Sub-chilling tækni Skaginn 3X. Tæknin er meðal annars þróuð í samstarfi við Fisk Seafood. Fyrsti búnaðurinn var settur um borð í Málmey SK1 fyrir rúmum tveimur árum síðan, samkvæmt tilkynningu.

Tæknin gerir meðal annars notkun íss við geymslu fersks fisks óþarfa.

Þá verður einnig sett um borð í Drangey sjálfvirk færsla á kerum niður í lest af svipuðum toga og nú hefur verið komið fyrir um borð í Engey RE91. Saman tryggja kerfin samfellu í meðhöndlun afla um borð, aukin afköst við veiðar og gefa auk þess möguleika á rekjanleika afla frá veiðum til neyslu.

Jón Eðvald Friðriksson, framkvæmdastjóri Fisk Seafood, segir búnað þann, sem þróaður var í samstarfi fyrirtækjanna og settur var um borð í Málmey, hafa reynst mjög vel.

„Væntingar um aukin gæði afla með þessari nýju aðferð hafa staðist og því voru kaupin á búnaði fyrir Drangey rökrétt framhald,“ segir hann.

Ingólfur Árnason, framkvæmdastjóri Skaginn 3X, segir samninginn við Fisk Seafood afar ánægjulegan í ljósi þess að um aðra sölu slíks búnaðar sé að ræða milli fyrirtækjanna.

„Betri viðurkenningu geta framleiðendur ekki fengið en ánægðan viðskiptavin sem kemur aftur. Þróunarsamstarf fyrirtækjanna hefur skilað miklum árangri og þessi samningur staðfestir það,” segir hann.