Samið um leiguverkefni í Suður-Ameríku

Loftleiðir Icelandic, dótturfélag Icelandair Group, og suður-ameríska flugfélagið LAW (Latin American Wings) hafa gert samning um leigu á Boeing 757-200 þotu frá og með október í vetur.

Þetta kemur fram í tilkynningu frá Icelandair. Þar kemur fram að LAW sé flugfélag sem sinni áætlunarflugi til Argentínu, Chile, Dóminíska Lýðveldisins, Haíti, Perú og til Venesúela.

„Floti félagsins samanstendur í dag af fimm Boeing 737-300 þotum, en með tilkomu samningsins við Loftleiðir Icelandic mun félagið geta hafið flug til New York og Miami í Bandaríkjunum frá Caracas í Venezúela og frá Santiago í Chile. Boeing 757 þotan sem leigð verður til LAW kemur úr flota Icelandair og verður flogið af flugmönnum Icelandair,“ segir í tilkynningunni.

Þar er haft eftir Halldóri Halldórssyni, framkvæmdastjóra hjá Loftleiðum Icelandic, að það sé mikið ánægjuefni að samningurinn sé í höfn. „Mótaðilar okkar eru að kaupa þá reynslu og sérþekkingu sem starfsfólk fyrirtækja innan Icelandair Group býr yfir og við hlökkum til samstarfsins.“

Ekki er langt síðan tilkynnt var um samning Loftleiða Icelandic við TACV Cabo Verde Airlines og ríkisstjórn Grænhöfðaeyja um samstarf við endurskipulagningu flugfélagsins TACV Cabo Verde Airlines.