Azazo fengið 154 milljónir frá ríkinu

Nýsköpunarsjóður atvinnulífsins (NSA) hefur fjárfest í hugbúnaðarfyrirtækinu Azazo fyrir 154 milljónir króna. Um er að ræða áhættufjárfestingasjóð í eigu ríkisins en eins og Fréttablaðið greindi frá á miðvikudag rambar fyrirtækið á barmi gjaldþrots.

NSA fór inn í hluthafahóp Azazo, þá Gagnavarslan, árið 2009 en fyrirtækið var stofnað tveimur árum áður. Það var þá til húsa á gamla varnarliðssvæðinu á Ásbrú í Reykjanesbæ og bauð upp á heildarlausn á sviði skjalamála og varðveislu gagna. Sjóðurinn átti þá 20 prósenta hlut, var þriðji stærsti hluthafinn, en er í dag stærsti eigandi þess með 17,2 prósent.

Eignir Azazo voru kyrrsettar af Sýslumanninum á höfuðborgarsvæðinu í síðustu viku að beiðni Brynju Guðmundsdóttur, fyrrverandi forstjóra og stofnanda Azazo. Hún hefur stefnt félaginu fyrir dómstóla eftir að ráðningarsamningi hennar var rift í kjölfar mikilla deilna milli hennar og stjórnarmanna.

Í samtali við Fréttablaðið á miðvikudag sagðist Brynja hafna öllum ásökunum stjórnarinnar og meðal annars því að hún hafi haldið eftir upplýsingum um raunverulega stöðu fyrirtækisins sem tapaði í fyrra 633 milljónum.

Stjórnarformenn Azazo hafa undanfarin ár komið úr röðum NSA og verið starfsmenn sjóðsins. Núverandi stjórn fyrirtækisins var kjörin á hluthafafundi félagsins þann 27. júlí síðastliðinn áður en aðalfundur var haldinn 20. september.

Brynju var fylgt út úr húsakynnum Azazo þann 6. júlí eða sama dag og ráðningarsamningi hennar var rift. Var henni fylgt út af þáverandi stjórnarformanni fyrirtækisins, Agli Mássyni, sem þangað til síðasta sumar var fjárfestingastjóri NSA. Sá sem gegnir nú þeirri stöðu, Friðrik Friðriksson var ráðinn eftirmaður hans í byrjun júní og er nú stjórnarformaður Azazo.

Í nýjum ársreikningi fyrirtækisins, sem var skilað inn til Ríkisskattstjóra þann 19. september, er Egill aftur á móti enn skráður í stjórn félagsins sem og fjórir aðrir stjórnarmenn sem allir eru hættir. haraldur@frettabladid.is