Átakanleg brottvísun flóttamannafjölskyldu: „Hún bara emjaði allan tímann“

Farþegi í flugi til Frankfurt í Þýskalandi segir að átakanlegt hafi verið að sitja undir sorg flóttamannafjölskyldu sem vísað var úr landi með fluginu. Móðirin, sem er barnshafandi, og ungur sonur hennar hafi grátið hástöfum allt frá því að flugvélin tókst á loft og þá hafi hjónin ekki fengið að sitja saman í flugvélinni.

Nasr Mohammed Rahim, eiginkonu hans Sobo Anwar Hasan og eins og hálfs árs gömlum son þeirra, Leo, var vísað úr landi með flugi til Frankfurt þann 30. nóvember síðastliðinn. Í samtali við Vísi sagði Sema Erla Serdar, formaður Solaris – hjálparsamtaka fyrir hælisleitendur og flóttafólk á Íslandi, að lögreglan hefði komið á heimili fjölskyldunnar á miðvikudag. Þar hafi þeim verið tilkynnt að þeim yrði vísað úr landi. Þeim hafi verið skipað að pakka niður og fjarlægði lögreglan fjölskylduna síðan af heimilinu.

Fengu ekki að sitja saman

Íris Sveinsdóttir fararstjóri hjá Bændaferðum var farþegi í flugi Icelandair til Frankfurt á fimmtudag. Í samtali við Vísi segir hún að fjölskyldan hafi verið í mikilli geðshræringu og að þungbært hafi verið að fylgjast með því hvernig ástatt var fyrir þeim.

„Konan grét alveg ofboðslega. Hún bara emjaði allan tímann, og var í ofboðslegri geðshræringu þegar hún fór inn í vélina. Mér er svo sagt að hún hafi verið sett í handjárn. Þau sátu bæði í miðjusæti og alltaf einhverjir tveir í kringum þau, og sennilega barnið með henni, og barnið náttúrulega grét líka alveg rosalega. Mér skildist á flugfreyjunum að það hefðu verið fimm lögreglumenn með þeim.“

Málið hafði ekki komið á borð lögreglunnar í Keflavík að því er fram kom í samtali Vísi við varðstjóra í kvöld. Þá náðist ekki í lögreglustjórann á Suðurnesjum við vinnslu þessarar fréttar.

Barnshafandi með óútskýrðar blæðingar

Sobo Anwar Hasan er 24 ára gömul og frá Íran en Nasr Mohammed Rahim er 26 ára og frá Írak. Sema Erla sagði í samtali við Vísi í vikunni að þau hafi orðið ástfangin og ákveðið að ganga í hjónaband þrátt fyrir að fjölskyldur þeirra hafi verið mótfallnar því. Þau flúðu til Íraks þar sem hryðjuverkamenn reyndu að fá Nasr til liðs við sig. Þau tóku því þá ákvörðun að flýja til Evrópu og sóttu fyrst um hæli í Þýskalandi þar sem þau fengu neitun. Nú sé því hætta á að fjölskyldan verði send beint til Írans eða Íraks þar sem þau óttast mjög um líf sitt.

Þá sagði Sema Erla stöðuna enn fremur mjög alvarlega vegna þess að konan, Sobo Anwar, er barnshafandi og með óútskýrðar blæðingar og verki. Þá skildist Semu Erlu að heilbrigðisstarfsmaður hafi fylgt fjölskyldunni úr landi, ástandið hafi verið talið það alvarlegt.

„Ég bara skil þetta ekki“

Íris segir einnig að eftir átakanlega flugferð hafa verið erfitt að stíga út úr flugvélinni við lendingu í Frankfurt.

„Fólkið var sjokkerað þegar það kom út,“ segir Íris í samtali við Vísi. „Þar stóð lögreglumaður með hríðskotabyssu og ég reyndi að útskýra fyrir þeim að það væri eðlilegt, það eru allir lögreglumenn á flugvellinum í Frankfurt með hríðskotabyssu. Þetta var ofboðslega sorglegt,“ segir Íris.

„Ég var með kökk í hálsinum allan tímann. Ég er svo ofboðslega stolt af því að vera Íslendingur en mér fannst þetta svo ofboðslega sárt. Ég bara skil þetta ekki.“