Þetta var náttúrulega áttræðisafmæli

Já, það er rétt, ég var nú bara búinn að gleyma því, stundum er það svona þegar mikið er að gera,“ sagði Björgvin Franz Gíslason þegar hann var minntur á fertugsafmælið sem er í dag. Samtalið átti sér reyndar stað fyrripart vikunnar og þá var hann á fullu að æfa fyrir tónleikana Hnallþórujól ásamt Esther Jökulsdóttur en nú eru þeir tónleikar yfirstaðnir þetta árið. Óður til hinna amerísku jóla, að sögn Björgvins.

„En ég er búinn að halda upp á fertugsafmælið,“ tekur hann fram. „Við héldum sameiginlega upp á fertugsafmælin, ég og konan mín Berglind Ólafsdóttir, því hennar var 28. nóvember og mitt núna 9. desember. Það var svaka veisla. Þetta var náttúrlega áttræðisafmæli og okkur fannst alveg tilvalið að halda það í félagsheimili aldraðra uppi í Hraunbæ 105. Það var æðislega gaman,“ segir hann og lýsir partíinu nánar. „Það kom hópur úr Ellyjarsýningunni og tók lagið. Svo gáfu pabbi og mamma okkur uppistand með Ara Eldjárn í afmælisgjöf. Honum fannst það sniðugt að gefa afmælisgjöf sem ekki væri hægt að skila. Ari sló alveg í gegn. Var alveg hápunkturinn. Svo er ein kona í bænum sem gerir snittur og brauðtertur upp á danska móðinn, hún Guðrún Karólína hjá Smurbrauðsstofu Silju. Hvort tveggja var sko algert listaverk og okkur fannst það líka vel við hæfi að vera með svona mikið af brauðtertum í áttræðisafmælinu!“

Þó svo stórafmælið beri nú upp á laugardag segir Björgvin Franz það bara verða aukaglaðning. „Ég verð náttúrulega að vinna eins og alltaf en ég mun hitta vini mína og borða með þeim einhvers konar þakkargjörðarmáltíð. Það verður fínt.“

Björgvin Franz hefur nóg að gera í leikhúsinu. Hann slær í gegn í ýmsum hlutverkum í sýningunni Elly, meðal annars sem Raggi Bjarna. Það er ekkert lát á vinsældum þeirrar sýningar og eflaust fá einhverjir miða á hana í jólagjöf. „Svo er alltaf eitthvað af litlum verkefnum inn á milli hjá mér, fyrir utan að vera fjölskyldufaðir,“ segir hann og er í framhaldinu spurður um barnafjölda á heimilinu. „Við eigum eina dóttur sem er að verða níu ára og svo er önnur sextán. Byrjuðum svolítið snemma í barneignunum og erum glöð með það núna.“

gun@frettabladid.is