Konurnar eru í öndvegi

Það er sjaldgæft að boðið sé upp á barokktónlist eftir konur,“ segir Diljá Sigursveinsdóttir fiðluleikari og lýsir tónleikahúsdagskrá í tónskóla Sigursveins í Hraunbergi 2 í kvöld klukkan 20.

Konur eru þar í öndvegi og dagskráin kallast Í gegnum rimlana því stór partur verkanna er saminn af nunnum. „Í klaustrunum voru helst tækifæri fyrir konur að skrifa tónlist því þar fengu þær menntun,“ útskýrir Diljá.

Ítalskir lofsöngvar frá miðöldum verða sungnir líka, að sögn Diljár, höfundar þeirra eru óþekktir en hún segir ýmislegt benda til að þar hafi konur verið að verki.

Á milli hinna fornu tónverka verður leikin ný raftónlist eftir Kristínu Lárusdóttur og farið verður með textabrot sem unnin hafa verið í samvinnu við leikstjórann Gígju Hólmgeirsdóttur. Lagt er út frá heimildum um ævi Lucr­eziu Orsina Vizzana sem bjó í Santa Christina klaustrinu í Bologna.

Kammerhópurinn Reykjavík­Barokk stendur að dagskránni. Hann skipa Jóhanna Halldórsdóttir altsöngkona, Diljá Sigursveinsdóttir fiðluleikari, Guðbjörg Hlín Guðmundsdóttir fiðluleikari, Ólöf Sigursveinsdóttir sellóleikari, Steingrímur Þórhallsson, organisti og semballeikari, og Kristín Lárusdóttir tónskáld.

Sviðssetning er í höndum Gígju Hólmgeirsdóttur, leikstjóra og dramatúrgs. Einnig kemur fram ungt fólk úr Sönghópi Fjölbrautaskólans í Breiðholti og úr sönghópnum Litrófinu sem starfræktur er í Fella- og Hólakirkju undir stjórn Arnhildar Valgarðsdóttur.

„Við höfum verið að kynna barokk í Breiðholtinu fyrir nemendum Tónskólans og 7. bekkjar Hólabrekkuskóla, ásamt foreldrum, en í kvöld er opið fyrir alla,“ lýsir Diljá og segir framtakið lið í að færa tónlistina nær fólkinu.

„Börnin voru opin og skemmtileg, lifðu sig inn í söguna sem við erum að segja og spurðu háleitra spurninga á eftir. Ég held líka að raftónlistin hennar Kristínar tengi saman fortíð og samtíð.“ Hún segir aðsókn að tónlistarnámi hafa minnkað í Breiðholtinu og margar ástæður geta legið til þess, meðal annars efnahag.



Leikið verður á upprunaleg hljóðfæri í kvöld í sal Tónskóla Sigursveins í Hraunbergi að sögn Diljár. „Þar er semballinn og við þyrpumst um hann.“