Tími til að sá kryddjurtum

Tími fyrir forsáningu kryddjurta til að hafa í pottum inni er hafinn. Svo er hægt að sá aftur fyrir þeim sem eiga að fara út í garð. Noti maður mikið af kryddjurtum borgar sig að vera með sáningu á nokkrum stigum.

„Það er orðið það bjart úti að plöntur geta dafnað í gluggum. Það er upplagt að sá fyrir basilíku núna. Hún er hitakær og hún þrífst bara inni. Kóríander sem sáð er núna myndi ekki farnast vel þegar því væri plantað út þar sem það sprettur úr sér inni. Það er hins vegar hægt að sá kóríanderfræjum núna til tína blöðin af jafnóðum af og neyta þeirra. Svo er hægt að sá aftur fyrir kóríander sem á að fara út. En það má líka sá kóríander beint út þegar tími er kominn til að sá út,“ segir Lára Jónsdóttir, garðyrkjufræðingur hjá Blómavali.

Hún segir að þar sem tímían og rósmarín auk graslauks og steinselju sé svolítið lengi að spíra sé ágætt að byrja að sá þessum kryddjurtum.

Við sáningu þarf að gæta þess að vera með nýja, góða mold, gjarnan sáðmold. Lára tekur það fram að sáðmold sé þó ekki skilyrði við sáningu kryddjurta. „Maður getur sáð öllum þessum jurtum beint í potta með venjulegri mold en hún þarf að vera ný.“

Sett eru 20 til 30 fræ í hvern pott af stærðinni 10 til 15 cm, að því er garðyrkjufræðingurinn bendir á. „Reglan við sáningu er að þekja ekki fræin meira en sem nemur tvöfaldri til þrefaldri þykkt þeirra. Ef fræin eru ofsalega fíngerð klappar maður þeim bara ofan á moldina.



Gæta þarf þess að moldin sé vel rök áður en fræin eru sett niður. Sé vökvað eftir á er hætta á að fræin skolist til.

Gott er að breiða plast, sem hefur verið gatað, yfir pottana. Séu þeir í glugga sem sólin skín á ætti að breiða hvítt plast yfir til að fræin hitni ekki of mikið. Góður spíringarhiti er 22 til 24 gráður. Ef plast er haft yfir þarf að vökva sjaldnar í spírunarfasanum. Nóg er að fylgjast vel með því að jafn raki sé í moldinni, að sögn Láru.

Verði stilkurinn á plöntunni þunnur og ræfilslegur er líklegt að of dimmt eða of heitt hafi verið á fræjunum. Jafnvægi þarf að vera á milli birtu og hita.

Ekki þarf að gefa næringu fyrr en kominn er góður vöxtur í plöntuna. Meðan rótin er ung og viðkvæm er beðið með áburðargjöf.