Guðjón Hauksson skipaður forstjóri Heilbrigðisstofnunar Austurlands

Kristján Þór Júlíusson heilbrigðisráðherra hefur skipað Guðjón Hauksson forstjóra Heilbrigðisstofnunar Austurlands frá 1. janúar 2017. Guðjón var metinn hæfastur úr hópi sex umsækjenda af hæfnisnefnd sem skipuð er samkvæmt lögum um heilbrigðisþjónustu.

Guðjón lauk BS gráðu í hjúkrun frá Háskóla Íslands árið 2006. Árið 2009 lauk hann meistaragráðu í hagfræði frá Háskóla Íslands og árið 2011 útskrifaðist hann með meistaragráðu frá Boston University School of Public Health á sviði rannsókna tengdum heilbrigðisþjónustu.

Frá árinu 2013 hefur Guðjón starfað sem deildarstjóri við Heilbrigðisstofnun Austurlands. Hann hefur einnig starfað sem sérfræðiráðgjafi hjá Lyfjagreiðslunefnd, gegnt stöðu sérfræðings í velferðarráðuneytinu, starfað sem verkefnastjóri á Landspítala og þar starfaði hann einnig sem hjúkrunarfræðingur á árunum 2006 -2008.

Í niðurstöðu hæfnisnefndar segir meðal annars að Guðjón hafi góða þekkingu og yfirsýn á heilbrigðisþjónustu, sé með skýra sýn á hlutverk Heilbrigðisstofnunar Austurlands og verkefni forstjóra, sé gæddur góðum leiðtogahæfileikum og hafi valist til margvíslegra forystu starfa.