Að brjóta umferðarlögin í Taiwan er dýrt

Þeir sem á einhvern hátt brjóta umferðarlögin í Taiwan eiga það á hættu að ökutæki þeirra verði tekin af þeim af yfirvöldum og eyðilögð. Ekki síst er sú hætta fyrir hendi ef lögin eru ítrekað brotin. Það er einmitt það sem eigandi þessa afar dýra bíls gerði, en hann var með ólöglega skráningarplötu og hafði ekki sinnt viðvörunum og bætur á því. Fyrir vikið tóku yfirvöld þennan Lamborghini Murcielago og rifu hann í tætlur að viðstöddum fjölda blaðamanna.

Það gerðu þau til að sýna öðrum brotamönnum það fordæmi að ítrekuð brot enda svona. Í flestum öðrum löndum fá brotamenn sektir, en ráðamenn í Taiwan telja að drastískari aðferðir séu skilvirkari til koma á reglu í landinu. Það þætti heldur ekki mikið brot víða að vera með ólöglega skráningarplötu, en því eru yfirvöld í Taiwan ósammála.

Nýir Lamborghini Murcielago bílar kosta frá 37 til 62 milljóna króna og því er tjón eiganda þessa bíls mikið. Lamborghini Murcielago er 632 hestöfl, enda V12 vél í bílnum með 6,5 lítra sprengirými. Fyrir margan bílaáhugamnninn er hreinlega sárt að horfa á myndskeiðið hér að ofan þar sem stórvirk vinnuvél með gripkló hakkar í sig glæstan og rándýran bílinn.