Stóð á steini og tók myndir þegar aldan greip hann

Kínverski ferðamaðurinn, sem lést þegar alda greip hann í Reynisfjöru á ellefta tímanum í morgun, var að taka mynd þegar slysið átti sér stað. Þetta kemur fram í tilkynningu frá lögreglunni á Suðurlandi.

Maðurinn stóð upp á fimmtíu sentimetra háum stuðlabergsstöpli, skammt frá stuðlaberginu við Reynisfjall, þegar alda braut á steininum og greip manninn með sér með fyrrgreindum afleiðingum. Steininn má sjá á myndinni sem fylgir fréttinni.

Björgunarsveitir komu á staðinn en lífgunartilraunir voru árangurlausar. Maðurinn var úrskurðaður látinn á vettvangi slyssins. Hann var fæddur árið 1976 og var hér á ferð ásamt eiginkonu sinni.

Lögreglan á Suðurlandi fer með rannsókn málsins.