Heima hlusta ég á popptónlist

Hefur þú alltaf búið í Austurríki, Magnús?

Já, ég er fæddur og uppalinn í Vínarborg, en kom til Íslands á hverju sumri þangað til ég var sex ára. Síðan hef ég komið þrisvar. Það sem ég elska mest við Ísland er hin óspillta náttúra og frelsistilfinningin sem tengist henni. Ég dýrka hálendið, til dæmis Laka og Sprengisand! Í fyrrasumar fór ég í hestaferð með fjölskyldunni. Það er það besta sem ég geri á Íslandi.

Hvað hefur þú sungið lengi?

Ég byrjaði fimm ára í blönduðum barnakór og í skóla Vínardrengjakórsins sex ára, þar voru æfingar á hverjum degi, svo byrjaði ég sem Vínardrengur 10 ára og nú er ég þrettán.

Eru allir góðir vinir í kórnum?

Þar sem við syngjum saman, spilum fótbolta, búum í heimavistarskóla og ferðumst saman myndast sterk tengsl milli okkar. Besti vinur minn er frá Ítalíu, en mér líkar eiginlega við alla í kórnum og finnst rosalega gaman þar.

Til hvaða landa hafið þið ferðast?

Ég fór í fimm vikna ferðalag til Síle og Brasilíu þegar ég var nýbyrjaður. Tveimur vikum seinna fórum við í 10 vikna ferð um Bandaríkin og Kanada og í fyrravor var ég í Japan í tvo mánuði.

Líður þér eins og rokkstjörnu þegar þú ferðast um með kórnum?

Nei, en stundum er okkur tekið eins og rokkstjörnum, eins og í Suður-Ameríku og Asíu. Í Síle sungum við einu sinni fyrir 12.000 manns.

Hvað ætlar þú að gera þegar þú verður stærri?

Mig langar að verða leikari eða hljómsveitarstjóri. En fyrst langar mig í skóla á Íslandi.

Hvaða tónlist finnst þér skemmtilegust?

Mér finnst gaman að syngja messur í Hofburg og líka polka í Musik­verein en heima hlusta ég á popptónlist. Ég er – eins og Árni frændi orðar það – alæta á tónlist.

Hlakkar þú til að syngja fyrir Íslendinga?

Já, það verður æðislegt. Ég hef sungið í Carnegie Hall, Suntory Hall og Musikverein en það verður stór stund fyrir mig að syngja fyrir Íslendinga í Hörpu! Ég sýndi strákunum myndir af Hörpu, þeir sögðu bara VÁ!