Flott veiði í Laxá í Dölum

Laxá í Dölum er ein af þessum ám sem á yfirleitt frábæra endaspretti þegar haustlægðirnar láta á sér kræla.

Það er engin undantekning á þessu sumri og hefur veiðin síðustu daga verið hreint frábær.  Síðasta þriggja daga holl landaði 129 löxum á sex stangir og hollið þar á undan var með 128 laxa eftir þriggja daga veiði. Það er óhætt að segja að það sé mokveiði í ánni en geysilega mikill lax er í sumum hyljum Laxá og veiðin nú þegar komin yfir heildarveiðina í fyrra sem þó er á listanum yfir eitt af 10 bestu sumrunum í ánni.  Heildarveiðin í fyrra var 1.578 laxar en núna stefnir áinn hraðbyri í 1.600 laxa.  Besta árið var metsumarið 1988 þegar 2.385 laxar veiddust en frá árinu 2003 hefur Laxá í Dölum farið samtals sex sinnum yfir 1.000 laxa sem er feyknagóð veiði á 4-6 stangir.  Eftirspurn eftir dögum er það mikil að útlit er fyrir að áinn sé þegar að verða ef ekki orðin uppseld fyrir næsta sumar.