Audi kaupir í bílaleigu

Silvercar bílaleigan hefur ákveðna sérstöðu meðal bílaleiga. Fyrirtækið leigir aðeins út silfurlita Audi bíla á flugvöllum í Bandaríkjunum og leigjendur bílanna panta þá gegnum símaapp og þegar bílarnir eru sóttir fer engin pappírsvinna fram heldur stíga þeir beint uppí bílinn og leggja af stað.

Þessari leigu hefur gengið mjög vel undanfarið og hefur Audi nú fjárfest fyrir 3,7 milljarða króna í leigunni. Með þessari fjárinnsprautun í leiguna ætlar Silvercar að fjölga mjög leigustöðum um Bandaríkin.

Silvercar var stofnað árið 2012 og hóf starfsemi sína á flugvöllum í Los Angeles, San Francisco, Miami, Orlando, Dallas, Austin og Denver. Á síðustu 6 mánuðum opnaði leigan einnig leigur á flugvöllum í New York, Chicago, Las Vegas og Fort Lauderdale og enn á að auka við starfstöðvar.

Þá ætlar Silvercar og Audi einnig að bjóða fyrirtækjum að leigja bíla til starfmanna sinna. Forstjóri Audi í Bandaríkjunum tekur sæti í stjórn Silvercar með þessum kaupum á hlutabréfum í fyrirtækinu.