Kemur undan forsetafeldinum í veislu á sunnudaginn

Vigfús Bjarni Albertsson sjúkrahússprestur á Landspítalanum mun taka afstöðu til forsetaframboðs næstkomandi sunnudag. Þá mun stuðningshópur hans afhenda undirskriftalista þar sem skorað er á hann að fara fram. Hann mun gefa svar við áskoruninni. Þetta kemur fram í tilkynningu frá hópnum.

„Hópur fólks sem hefur verið svo heppinn að kynnast Vigfúsi Bjarna Albertssyni og eiginkonu hans Valdísi Ösp Ívarsdóttur hefur sameinast um að skora á Vigfús Bjarna til að bjóða sig fram til embættis forseta Íslands,“ segir í tilkynningunni.

„Ákveðið var að leita eftir stuðningi við framboð Vigfúsar úr ólíkum áttum. Það reyndist auðsótt mál enda eru Vigfús og Valdís bæði vel virt og þekkt á meðal samstarfsfélaga, vina og fjölskyldu. Fyrr en varði voru 500 undirskriftir komnar á blað.“

Afhending undirskriftana fer fram í samsæti til heiðurs Vigfúsi og Valdísi mun fara fram sunnudaginn 6. mars kl. 14 á Hótel Borg í Reykjavík. Þar er fullyrt að hjónin muni greina frá ákvörðun sinni varðandi embættið en auk þess verða skemmtiatriði.

Leikkonan Nína Dögg Filippusdóttir mun stýra veislunni og önnur leikkona, Halldóra Geirharðsdóttir, mun ávarpa veislugesti líkt og Felix Valsson, starfandi læknir á Landspítalanum.

Áhugafólk um næstu forsetakosningar og framboð Vigfúsar Bjarna er boðið hjartanlega velkomið.

„Það er okkar einlæga ósk að sem flestir sjái sér fært um að mæta á Hótel Borg og fái tækifæri til að kynnast þeim Vigfúsi og Valdísi. Hlökkum til að sjá ykkur!“