Hissa að vera ekki fertug fyrr

„Þetta eru ágætis tímamót,“ segir Guðrún Eva Mínervudóttir rithöfundur spurð hvernig henni finnist að eiga fertugsafmæli í dag. „Ég er bara alveg hissa að það skuli ekki hafa verið fyrr, mér hefur fundist svo lengi að ég væri alveg að verða fertug.“

Guðrún Eva býr í Hveragerði með eiginmanninum Marteini Þórssyni, handritshöfundi og leikstjóra, og fjögurra ára dóttur þeirra, Mínervu. Hún er ánægð fyrir austan fjall. „Það er fínt að vera aðeins úti á landi,“ segir hún og kveðst hafa ágætan samanburð. „Ég átti heima í Reykjavík fyrstu ár ævi minnar og svo aftur þegar ég flutti að heiman úr Garðinum í Gerðahreppi, þá búin að vera víða á landsbyggðinni.

„Alltaf að skrifa? Já, það er eina alvöru vinnan mín, sú eina sem ég fæ borgað fyrir,“ segir Guðrún Eva sem gaf út sína fyrstu bók árið 1998 þegar hún var 22 ára. Það var smásagnasafnið Á meðan hann horfir á þig ertu María mey. Hún lofar ekki bók á þessu ári en segir það góðan möguleika.

Annað kvöld ætlar Guðrún Eva að halda upp á afmælið í Petersen svítunni á efri hæð Gamla bíós.

„Þangað eru allir velkomnir sem þykir vænt um mig, þó þeim hafi ekki verið boðið,“ segir hún og tekur fram að engar keyptar veitingar verði í boði, bara tilboð á barnum.

„Ég hef afþakkað gjafir svo ég þarf ekki að vita hversu margir koma, en það er opið hús og skífuþeytir á staðnum. Vonandi verður stuð.“