Evrópusambandið sektar þrjá bílaíhlutaframleiðendur fyrir verðsamráð

Komist hefur upp um verðsamráð þriggja japanskra íhlutaframleiðenda í bíla, þ.e. Mitsubishi Electric Corp., Hitachi Ltd. og Denso. Mikil rassía er nú í gangi hjá yfirvöldum í Evrópu, Bandaríkjunum og Asíu gegn fyrirtækjum sem staðið gætu að verðsamráði og þetta mál er aðeins eitt af mörgum, að sagt er, sem ákært verður í á þessu ári.

Margt virðist því í pípunum hvað verðsamráðsmál varðar á árinu. Þessi þrjú fyrirtæki hafa haldið uppi verði á íhlutum til bílaframleiðenda og þeirra sem selja varahluti í notaða bíla og vonandi kemur þessi sekt til með að lækka verð á bílum á næstu árum, sem og varahluti í þá.

Evrópusambandið hefur heimildir til sektar allt að 10% veltu fyrirtækjanna, en ekki er víst að kröfur þess verði svo háar. Mitsubishi Electric Corp. og Hitachi Ltd., ásamt fleiri fyrirtækjum voru sektuð af bandarískum yfirvöldum árið 2013 og því kemur það ef til vill á óvart að þau hafi ekki lært af reynslunni og halda áfram iðju sinni.

Evrópusambandi rannsakar nú samskonar verðsamráðsmál framleiðenda miðstöðva í bíla, ljósa, sætisbelta, stýrishjóla, pústkerfa og fleiri varahluta í bíla.