Segir háskalega fáar þotur rúmast á varaflugvöllum

Formaður öryggisnefndar Félags íslenskra atvinnuflugmanna segir háskalegt ástand geta skapast verði flughlöð ekki stækkuð á varaflugvöllum Keflavíkurflugvallar.  Fjallað var um málið í fréttum Stöðvar 2 og rætt við Njál Trausta Friðbertsson, bæjarfulltrúa á Akureyri. 

Akureyrarflugvöllur er einn þriggja flugvalla hérlendis sem gegnir hlutverki varaflugvallar fyrir millilandaflugið til Keflavíkur. Hann er jafnframt sá umferðarmesti utan suðvesturhorns landsins. 

Stóraukning flugumferðar til Íslands hefur gjörbreytt stöðunni. Við getum vel séð fyrir okkur dæmi þar sem kannski tuttugu þotur, fullar af farþegum, eru á leið til Íslands þegar Keflavíkurflugvöllur lokast skyndilega og allar þurfa að snúa til varavallar. Reykjavíkurflugvöllur er talinn geta tekið við yfir tuttugu farþegaþotum en hann gæti lokast um leið. 

Og það þarf ekki eldgos til. Dimm þoka gæti lagst samtímis yfir vellina suðvestanlands og þótt 2400 metra löng flugbrautin á Akureyri sé nægilega löng til að taka við flestum þotum takmarkast geta hans sem varavallar við það að flughlaðið rúmar bara fjórar til fimm stórar þotur. Sama staða er uppi á Egilsstaðaflugvelli.

„Þá eru þetta kannski fjögur til fimm stæði á hvorum stað. En þetta er orðin traffík á dag inn á Keflavík 85 vélar á sólarhring, verða yfir 100 á næsta ári. Þetta er fjórföldun frá Eyjafjallagosinu, umferð inn á Keflavík. Við þurfum að byggja innviðina með þessari gríðarlegu fjölgun til landsins í millilandafluginu,“ segir Njáll Trausti. 

Stjórn Vaðlaheiðarganga hf. er þegar byrjuð í hagræðingarskyni að láta sturta útgreftrinum úr göngunum í væntanlegt flughlað í trausti þess að ríkið muni klára verkefnið. Íslenskir atvinnuflugmenn telja það raunar svo brýnt að stækka flughlöð vallanna að formaður öryggisnefndar þeirra, Ingvar Tryggvason, lýsti því nýlega í grein í fréttabréfi FÍA að annars gæti háskalegt ástand skapast. 

„Það er því orðið mjög brýnt að stækka hlöðin á þessum völlum, til að fyrirbyggja að háskalegt ástand geti skapast,“ sagði Ingvar.

Bæjarráð Akureyrar hefur jafnframt bent á að stækkun flughlaðs sé forsenda þess að flugfélagið Norlandair og flugvélaverkstæði Arctic Maintenance geti byggt yfir starfsemi sína. 

„Þetta er náttúrlega mjög brýnt sem atvinnuhagsmunir fyrir rúmlega þrjátíu starfsmenn hérna á flugvellinum. Þeir hafa sagt í viðtölum að þeir væru að skoða það að flytja til Grænlands með sína starfsemi, til Syðri-Straumfjarðar. Þeir vilja náttúrlega geta horft til framtíðar og byggt yfir starfsemina. Þeir eru í miklum húsnæðisskorti hérna á flugvellinum,“ segir Njáll Trausti Friðbertsson bæjarfulltrúi.