Steinþór hættir sem bankastjóri Landsbankans

Steinþór Pálsson, bankastjóri Landsbankans, og bankaráð bankans hafa náð samkomulagi um að hann hætti störfum hjá bankanum.

Tilkynning þessa efnis var send út í gær. Ekki kemur fram í tilkynningu hverjar séu ástæður þess að Steinþór hættir, en bankinn hefur mikið verið gagnrýndur vegna sölu eignarhlutar í Borgun, meðal annars í nýrri skýrslu Ríkisendurskoðunar.

Haft er eftir Steinþóri í tilkynningu frá bankanum að síðastliðin sex og hálft ár hafi verið viðburðarrík og gríðarlega mikið hafi áunnist við að endurreisa fjárhag heimila og fyrirtækja. „Landsbankinn hefur tekið stakkaskiptum á þessum tíma og ég skil sáttur við mín störf,“ segir Steinþór í tilkynningunni. Hann vildi ekki tjá sig frekar um starfslokin þegar eftir því var leitað og vísaði í tilkynningu bankans.

Haft er eftir Helgu Björk Eiríksdóttur í tilkynningu að mörg krefjandi úrlausnarefni hafi verið leidd til lykta undir forystu Steinþórs og staða bankans styrkst. Við starfi Steinþórs tekur tímabundið Hreiðar Bjarnason, framkvæmdastjóri fjármála, en staða bankastjóra verður auglýst fljótlega.

Rekstur Landsbankans var góður undir stjórn Steinþórs og ljóst er að hann er ekki að hætta hjá bankanum af því að hann stóð sig ekki vel við rekstur hans. Er afkoma bankans besti vitnisburður þess en hann naut trausts bankaráðsins alveg þangað til í síðustu viku.

Samanlagður hagnaður Landsbankans á starfstíma Steinþórs Pálssonar í bankanum nemur um 170 milljörðum króna samkvæmt ársreikningum bankans frá 2010 og til dagsins í dag og níu mánaða uppgjöri þessa árs. Á sama tímabili hefur bankinn greitt ríkissjóði 82 milljarða króna í arð. 

Fréttin birtist fyrst í Fréttablaðinu