Blár Opal og Piparpúkar aftur í framleiðslu hjá Nóa

Líkur eru á að bæði Blár Opal og Piparpúkar muni sjást aftur í verslunum á næstu misserum. Nói Siríus hefur verið að þreifa fyrir sér í framleiðslu á sælgætinu vinsæla en Opalið og Piparpúkarnir voru tekin úr sölu vegna framleiðsluörðugleika.

Blár Opal var tekinn af markaði árið 2005 eftir að hætt var að framleiða helsta bragðefnið. Margir Íslendingar hafa kallað eftir vörunni og hefur Nóa Siríus borist fjölmargar áskoranir að hefja framleiðslu á ný. Þá eru jafnframt dæmi um að bláir opalpakkar séu seldir á uppboði fyrir þúsundir króna.

Vilja svara kalli neytenda

Auðjón Guðmundsson, framkvæmdastjóri markaðs- og sölusviðs hjá Nóa Siríus, segir að sælgætisgerðin sé sífellt að vinna að því að finna réttu bragðefnin svo hægt sé að svara kalli neytenda.

„Það er alltaf verið að reyna að prófa sig áfram en það hefur ekki verið tekin ákvörðun um hvort eða hvenær þetta fer í sölu,“ segir Auðjón í samtali við Vísi.

Enn þurfi að yfirstíga hindranir

Auðjón segir að enn þurfi að yfirstíga einhverjar hindranir áður en frekari ákvarðanir verði teknar. Þá segir hann að Nói Siríus hafi einnig verið að fikra sig áfram í framleiðslu á Piparpúkunum vinsælu, en líkt og með framleiðsluna á Bláum Opal vill hann lítið gefa upp.

„Það getur vel verið að það komi góðar fréttir á næsta ári,“ segir Auðjón.

Auðjón tekur það fram að Íslendingar séu sérstaklega nýjungagjarnir og taki alltaf vel í nýjar vörur frá Nóa. „Það er eins og að fólk sé jafnvel að verða opnara og opnara fyrir því að prófa. Við sjáum að það er alltaf spenna fyrir nýjum vörum ásamt því sem það er mikil eftirspurn fyrir þessum gömlu líka, eins og Bláum Opal og Piparpúkum.“