Ótrúleg heppni mótorhjólamanns

Því fylgir alltaf nokkur hætta að aka mótorhjóli, enda ökumenn þeirra bæði berskjaldaðri og ekki eins sýnilegir og bílar. Skertum sýnileika var þó ekki fyrir að fara í þessu tilfelli þar sem ökumaður mótorhjóls ekur bæði alltof hratt að gatnamótum og dúndrar líkt og viljandi beint á saklausan ökumann Lada leigubíls.

Þetta gerðist í umferðinni í Rússlandi um daginn, eins og reyndar margt annað skrautlegt sem endar á vefnum. Það sem er þó merkilegast við þennan árekstur eru afdrif mótorhjólamannsins, en hann verður að teljast með heppnari mönnum.

Við áreksturinn svífur hann í loft upp og fær þægilega lendingu uppá þaki Lada bílsins, eins og þangað hafi alltaf verið meiningin að fara. Hann rennur sér að lokum ofan af bílnum, alveg stráheill. Í flestum svona árekstrum eru afdrif ökumanna mótorhjóla ekki á þessa lund, en þessi virðist eiga sér nokkur líf.