Karítas ráðin markaðsstjóri hjá iglo+indi

Karítas Diðriksdóttir hefur verið ráðin markaðsstjóri hjá íslenska barnafatamerkinu iglo+indi.

Karítas er nýflutt til Íslands eftir átta ára dvöl í New York, London og Þýskalandi, en hún starfaði síðast sem Director of Brand Partnerships hjá hátískufyrirtækinu Moda Operandi í New York þar sem hún vann meðal annars með tískumerkjunum Marc Jacobs, Kenzo og Valentino. 

Í tilkynningu frá iglo+indi segir að Karítas muni styðja við vöxt fyrirtækisins á erlendum og innlendum mörkuðum.

„Karítas er viðskiptafræðingur frá Háskólanum í Reykjavík og stundaði skiptinám við CBS í Kaupmannahöfn. Hún hefur starfað á fyrirtækjasviði hjá Straumi fjárfestingarbanka á Íslandi og í London, hjá fjármálafyrirtækinu SNL Financial í London og hjá Icelandair í Frankfurt.

iglo+indi hefur verið í miklum vexti frá stofnun fyrirtækisins árið 2008 og eru vörur þess nú seldar í 18 löndum. Öll hönnun og þróun á barnafötum iglo+indi fer fram hér á landi en allur fatnaðurinn er framleiddur í fjölskyldureknum verksmiðjum í Portúgal,“ segir í tilkynningunni, en vörur fyrirtækisins eru seldar í rúmlega hundrað verslunum.