Fyrstu lokatölurnar komnar úr laxveiðiánum

Nokkrar laxveiðiárnar hafa þegar lokið veiði og það er áhugavert að skoða hvernig þær hafa staðið sig í sumar.

Blanda er með 2.386 laxa lokatölu og það er mjög gott ár í ánni en hún hefur aðeins fjórum sinnum síðan 1974 skilað meiri veiði.  Þverá/Kjarrá er með 1.902 laxa sem er sömuleiðis ágætt ár og er alveg í meðaltali síðustu 25 ára þar á bæ.  Haffjarðará er með 1.305 laxa sem er næstum því tvöfalt meðalár frá 1974 svo þar una menn vel við sitt.  Elliðaárnar með 675 laxa verður að teljast slakt ár en hún hefur þó sex sinnum skilað minni veiði bara frá árinu 2000.

Aðrar ár þar sem lokatölur eru komnar á borðið eru Hofsá og Sunnudalsá með 492 laxa, Skjálfandafljót með 404 laxa, Flókadalsá 369 laxa, Straumfjarðará 348 laxa, Laugardalsá 251 lax og Búðardalsá 211 laxa.  Í lok næstu viku verða síðan lokatölur komnar úr öllum sjálfbæru ánum en þá er aðeins veitt í þeim ám sem haldið er uppi með sleppingum.  Rangárnar tróna þar efstar á blaði en Ytri Rangá fer líklega nokkuð auðveldlega yfir 9.000 laxa og sú Eystri gæti líklega náð 3.700 löxum ef haustið verður gott.