Bolvíkingar tíndu tvö tonn af bláberjum

Mjólkurframleiðslufyrirtækið Arna hefur fest kaup á tveimur tonnum af íslenskum aðalbláberjum sem íbúar Bolungarvíkur tíndu í sumar til þess að hefja framleiðslu á nýju grísku jógúrti.

„Sumir voru ansi drjúgir, menn voru að tína upp í nokkur hundruð kíló,“ segir Hálfdán Óskarsson, framkvæmdastjóri Örnu. Hann segist ekki vita nákvæman fjölda þeirra sem tíndu en segir hann hafa verið töluverðan.

Í lok júlí auglýstu forsvarsmenn Örnu að þeir vildu kaupa bláber af duglegu fólki sem hefði gaman af því að veltast um fjallshlíðarnar með berjabláma í lófunum. Keypt voru ber af duglegu tínslufólki fram í lok ágúst, en Arna hyggst framleið haustjógúrt, grískt jógúrt með aðalbláberjum, sem verður pakkað í glerkrukkur. „Þetta er árstíðarvara sem við stefnum á að hafa á haustin og verður hún seld í takmörkuðu magni á meðan bláberin endast,“ segir Hálfdán. „Þetta kemur vonandi á markað upp úr miðjum september og fer í allar búðir sem vilja taka þetta inn."

Um er að ræða fyrsta skiptið sem Arna efnir til bláberjatínslu og framleiðslu bláberjajógúrts en stefnt er að gera þetta aftur að ári. Fyrir síðustu jól var fyrsta árstíðabundna vara Örnu kynnt sem var grískt jólajógúrt með eplum og kanil. „Við stefnum að því að vera með meira af árstíðabundnum vörum, þeim hefur verið vel tekið," segir Hálfdán.

Í sumar voru þrjú ár frá því að mjólkurframleiðsla hófst hjá Örnu í Bolungarvík. Eins og Fréttablaðið hefur greint frá var gríðarleg aukning í eftirspurn eftir vörum frá Örnu í sumar þegar umræðan um Mjólkursamsöluna og samkeppnismál stóð sem hæst. Hálfdán segir enn mikið að gera hjá fyrirtækinu. „Það er mikil aukning hjá okkur núna. Það er stöðug aukning," segir hann. Hálfdán sagðist í samtali við Markaðinn í ágúst búast við fimm til sex hundruð milljóna króna veltu á árinu sem er rúmlega tvöföldun frá því í fyrra.