María Björk til Expectus

María Björk Óskarsdóttir hefur gengið til liðs við Expectus. Fram kemur í tilkynningu að María Björk býr yfir víðtækri starfsreynslu til fjölda ára tengt fyrirtækjarekstri, markaðsráðgjöf, námskeiðahaldi auk verkefna- og framkvæmdastjórn ólíkra verkefna. Hún er Cand.Oecon í viðskiptafræði frá Háskóla Íslands, hefur lært markþjálfun og lokið PMD stjórnendanámi frá Háskólanum í Reykjavík.

Árið 2008 stofnaði María Björk ásamt samstarfskonu sinni, Nýttu kraftinn en saman þróuðu þær aðferðafræði, útfærðu kennsluefni og héldu árangursrík námskeið sem gríðarlegur fjöldi fólks í atvinnuleit sótti. Samnefnda bók gáfu þær út árið 2013 og buðu síðar upp á sérsniðna stjórnendaþjálfun í samstarfi við HR. María Björk hefur ennfremur veitt fjölda fólks, ekki síst stjórnendum, einstaklingsmiðaða ráðgjöf, haldið fyrirlestra og styttri námskeið sem og setið í stjórnum margra félagasamtaka.

María Björk starfaði um langt árabil sem markaðs- og viðskiptastjóri á auglýsingastofunum Yddu og Ennemm fyrir fyrirtæki úr flestum greinum atvinnulífsins, þaðan sem hún færði sig yfir til Landsbankans árið 2004. Þar vann hún að fjölbreyttum verkefnum bæði innan markaðs- og þjónustudeildar en tók svo að sér framkvæmdastjórn á umfangsmiklum sérverkefnum fyrir bankastjórn og bankaráð á árunum 2006-2008.

Hjá Expectus starfa nú 22 starfsmenn við ráðgjöf á sviði stefnumótunar, rekstrar, ráðninga og upplýsingatækni og við hugbúnaðargerð.