Auðveldar samskipti fyrir einkaþjálfara

Startup Reykjavik fer fram í fimmta sinn um þessar mundir. Tíu fyrirtæki hafa tekið þátt ár hvert. Fréttablaðið kynnti sér starfsemi þeirra fyrirtækja sem kynntu sig á PopUp & Pitch-kvöldinu á fimmtudaginn.

Ómar Yamak, Patrekur Maron Magnússon, Tómas Óli Garðarsson, Franz Jónas Arnar Arnarson og Kristján Einarsson mynda teymið að baki Strivo. Strivo veitir þjálfurum og einkaþjálfurum tækifæri til að selja þjónustu sína á nýju og áhugaverðu sniði.

Allir í teyminu eiga það sameiginlegt að hafa áhuga á heilsu og líkamsrækt. Fyrirtækið er að framleiða vefsíðu og síðar app sem gerir einkaþjálfurum eða þjálfurum kleift að setja inn allar upplýsingar sem þeir vilja veita sínum kúnnum. „Í stað þess að vera með blað frá þjálfaranum um hvað þú átt að gera ertu með app í símanum,“ segir Ómar. „Við leggjum áherslu á grunninn fyrst, síðan förum við að byggja inn í forritið.

Við byrjuðum með markmiðasetningarkerfi. Það kerfi er tilbúið og er á netinu en við ákváðum að taka smá stefnubreytingu og einbeita okkur að einkaþjálfurum.“

Teymið er með tengingu við fullt af einkaþjálfurum og er með hóp sem getur prófað síðuna. „Á næstunni viljum við gefa út það sem við getum sýnt þjálfurum og leyfa þeim að prufa, en síðan verður varan líklega tilbúin í lok ágúst. Appið kemur svo í framhaldinu,“ segir Ómar. 

„Við erum að fara að fókusera á fjárfesta eftir prógrammið, svo erum við að horfa til Tækniþróunarsjóðs og Nýsköpunarsjóðs atvinnulífsins,“ segir Patrekur. Teymið ætlar að einbeita sér að markaðssetningu og þróun vörunnar í haust samhliða áframhaldandi námi.



Fréttin birtist fyrst í Fréttablaðinu þann 9. júlí