Risarnir í Eystri Rangá

Við höfum greint frá góðum gangi í klakveiðinni í Eystri Rangá en henni er nú að ljúka og áin verður hvíld fyrir veiðimenn.

Það hefur sjaldan eða aldrei gengið jafn vel í Eystri Rangá í klakveiðinni en hún er undirstaða þess að gera ánni að veiðiá.  Laxarnir sem eru veiddir fyrst á tímabilinu eru notaðir til undaneldis og hefur afraksturinn af þeirri vinnu verið mjög góður en það má best sjá á veiðitölum síðustu ára.

Í heildina eru komnir um 400 laxar í klakið og er það nærri því að vera það magn sem þarf.  Laxarnir eru stórir þetta árið en mikið af þeim laxi sem þegar er búið að setja í kistur er 80 sm og stærri.  það hefur varla sést smálax ennþá í ánni og það er töluvert mikið af laxi í henni nú þegar sem þýðir að opnunin um helgina gæti orðið sú besta hingað til og miðað við árangurinn í Ytri Rangá í opnun þá eru veiðimenn sem eiga stangir fyrstu dagana eðlilega orðnir spenntir.

Ríkarður Hjálmarsson og Hjörleifur Steinarsson voru í hóp þeirra sem voru að ná í klakfisk og náðu þeir meðal annars í þessa tvo stórlaxa sem sjást á meðfylgjandi myndum og að sögn þeirra sem hafa verið við ánna síðustu daga í klakinu er nóg af þessum tröllum ennþá í hyljum hennar.