Fyrsti laxinn kominn á land í Brennunni

Veiðinsvæðin Straumar og Brenna hafa opnað fyrir veiðimenn og þegar hafa laxar veiðst á báðum svæðum.

Það skal svo sem engan undra að laxar hafi veiðst því þessi svæði eru neðst á þeim kafla Hvítár þar sem Þverá, Norðurá og Grímsá renna í Borgarfjörðinn og það fer gríðarlega mikið magn af laxi þarna um á þessum tíma.  Ingólfur Ásgeirsson leigutaki Þverár tók fyrsta laxinn í Brennunni og eins og sést á meðfylgjandi mynd er þetta vænn tveggja ára lax.  Það getur verið geysilega mikið líf á þessum svæðum þegar göngurnar eru í hámarki en besti veiðitíminn er yfirleitt fyrstu sex vikurnar en þegar líður á sumarið og laxagöngur minnka fer oft að bera meira á sjóbirting.

Leyfin á þessum neðstu svæðum eru oftar en ekki ódýrari en í ánum og það skemmir ekki fyrir því að veiðivon er góð þó svo að veiðistaðir séu fáir því þú ert alltaf að kasta á nýgengin lax.  Lykilatriðið hefur oft verið að nota þunga tauma og þungdar flugur til að veiða frekar djúpt en það á ekki við ef jökulvatnið er ekki áberandi.  Þá veiðist vel á flotlínur og t.d. Sunray Shadow.  Við eigum eftir að fá fleiri fréttir á næstunni af þessum svæðum sem og næstu opnunum í laxveiðiánum en þeirra er beðið með mikilli eftirvæntingu.