Andri Snær hlaut frönsk rithöfundaverðlaun

Andri Snær Magnason, rithöfundur og forsetaframbjóðandi, hlaut rithöfundaverðlaunin Grand Prix de l'Imaginaire fyrir Love Star í flokki vísindaskáldsagna. Þetta kemur fram í tilkynningu frá Andra Snæ en Love Star kom út á frönsku í fyrra og er sögð hafa notið mikilla vinsælda þar í landi en alls hefur hún verið gefin út á átta tungumálum.

Voru verðlaunin afhent við hátíðlega athöfn í St. Malo í dag þar sem Andri Snær veitti þeim viðtöku en eiginkona hans Margrét Torp var með í för. LoveStar hafði áður fengið íslensku bókmenntaverðlaunin árið 2003 og Philip K. Dick verðlaunin árið 2013.