Tugþúsunda fjölgun í hvalaskoðun árlega

Farþegar hvalaskoðunarfyrirtækja á Íslandi voru 42 þúsund fleiri í fyrra en árið 2014. Frá og með árinu 2012 hefur fjölgun farþega fyrirtækjanna numið tugum þúsunda hvert einasta ár, eða frá 25 til 44 þúsund manns. Sú fjölgun jafngildir árlega öllum þeim fjölda ferðamanna sem nýttu sér þessa afþreyingu í kringum aldamótin.

Þetta sýna tölur Samtaka ferðaþjónustunnar (SAF), sem teknar voru saman fyrir Fréttablaðið, og byggja á tölfræði Hvalaskoðunarsamtaka Íslands. Þær sýna að viðskiptavinir hvalaskoðunarfyrirtækjanna árið 2015 voru 272 þúsund, eða tæplega 100 þúsund fleiri en árið 2012. Árleg fjölgun hefur verið 15 til 34 prósent.

Fréttablaðið óskaði jafnframt eftir því að SAF gæfi upp spá sína um fjölgun ferðamanna á skipsfjöl hjá hvalaskoðunarfyrirtækjunum á þessu ári, og samkvæmt henni verða það tæplega 327 þúsund manns sem nýta munu þessa þjónustu, sem jafngildir um það bil íbúafjölda landsins. Því er ljóst að 20 til 25 prósent þeirra ferðamanna sem sækja landið heim hafa farið í hvalaskoðunarferð á undanförnum árum, enda 99 prósent viðskiptavina fyrirtækjanna erlendir gestir.

Í gögnum SAF kemur jafnframt fram að tólf fyrirtæki muni bjóða hvalaskoðunarferðir á þessu ári. Þeim hefur fjölgað hægt en örugglega á undanförnum árum en þau voru níu árið 2005 en tíu árið 2010, og tólf voru þau í fyrra. Starfsmannafjöldi þessara fyrirtækja var um 100 yfir sumartímann árið 2005 en losaði 250 í fyrra. Tvö þessara fyrirtækja gerðu út frá Reykjavík, fjögur frá Húsavík, þrjú í Eyjafirði og eitt fyrirtæki starfar á Ólafsvík, í Vestmannaeyjum og á Ísafirði.

Samtök ferðaþjónustunnar eiga fund með sjávarútvegsráðherra í næstu viku þar sem samtökin munu leggja áherslu á mikilvægi þess að stækka griðasvæði hvala á Faxaflóa. „Við viljum meina að verið sé að skerða atvinnufrelsi hvalaskoðunarfyrirtækja á Faxaflóa þar sem veiðar á hrefnu eru stundaðar á nánast sama svæði og hvalirnir eru skoðaðir. Að okkar mati er þetta spurning um skipulag og hvetjum við sjávarútvegsráðherra til að stækka griðasvæði á Faxaflóa í samræmi við óskir ferðaþjónustunnar,“ segir Skapti Örn Ólafsson, upplýsingafulltrúi Samtaka ferðaþjónustunnar.

Fréttin birtist fyrst í Fréttablaðinu 27. apríl.