Hittu á lofandi heitavatnsæðar

Niðurstöður úr borun rannsóknarholu við Hoffell í Hornafirði lofa mjög góðu. Tókst að bora niður á tvær heitar vatnsæðar en á síðustu árum hafa rannsóknir staðið yfir í þeirri von að nægjanlegt magn af heitu vatni finnist til reksturs hitaveitu fyrir Höfn í Hornafirði.

Það er á vegum RARIK sem leitað er jarðhita við Hoffell, en borun á nýjustu rannsóknarholunni hófst í febrúar síðastliðnum. Þar er haldið áfram með verkefni frá haustinu 2015 þegar boraðar voru tvær 500 metra djúpar holur í þeim tilgangi að prófa tilgátu um gerð og stærð jarðhitakerfisins sem byggir á enn eldri forathugunum – en upphaf jarðhitaleitar við Hornafjörð má rekja aftur til ársins 1992 og hefur staðið með hléum síðan, eins og greinir frá í gögnum Íslenskra orkurannsókna (ÍSOR) sem stýrt hafa rannsóknum fyrir RARIK á allra síðustu árum.

RARIK greinir frá því að borað hafi verið niður undir 1.100 metra dýpi og er hiti í botni holunnar rúmar 80 gráður. „Þegar komið var niður fyrir 850 metra fundust æðar sem flest bendir til að gefi nokkurt vatnsmagn, en það kemur ekki í ljós fyrr en borun er lokið og búið er að mæla holuna. Reiknað er með að hætta borun fljótlega og hefja mælingar. Endanleg afkastageta holunnar verður ekki ljós fyrr en eftir blástursmælingar sem fram fara á næstu dögum og prufudælingu úr holunni, sem taka mun nokkrar vikur.

Vonast er til að á svæðinu finnist nægjanlegt heitt vatn til að anna húshitunarþörf á Höfn í Hornafirði, eins og áður sagði.

Björn Ingi Jónsson, bæjarstjóri sveitarfélagsins Hornafjarðar, er varkár í orðum spurður um þýðingu þessara niðurstaðna. Verkið sé á ábyrgð RARIK, en í síðustu viðræðum sveitarfélagsins við fyrirtækið hefði ekki verið ljóst hverju hitaveita myndi skila í hagræðingu fyrir heimilin í sveitarfélaginu.

„En við reiknum með að það verði umtalsvert til lengri tíma litið. Heitt vatn hefur alls staðar verið talið mikil gæði og svo er einnig hér,“ segir Björn Ingi, sem hefur ekki rætt nýjustu niðurstöður rannsóknarborana við Hoffell við RARIK eða hvernig hlutirnir eru að þróast þessa dagana.

Hitaveita hjá 90% landsmannaUm 90% landsmanna hafa aðgang að jarðhita til að kynda hús sín.

Íbúar þeirra svæða sem ekki hafa aðgang að jarðhita og kynda hús sín með raforku eða olíu njóta niðurgreiðslna á húshitun.

Aðildarsveitarfélög Sambands sveitarfélaga á köldum svæðum eru í dag 25 talsins.

Þessi grein birtist fyrst í Fréttablaðinu þann 11. apríl.