Frá Kirkjusandi í Kópavog

Á stefnufundi starfsmanna Íslandsbanka sem fram fór fyrr í dag var tilkynnt að höfuðstöðvar Íslandsbanka munu á haustmánuðum flytjast í Norðurturninn í Kópavogi frá Kirkjusandi þar sem höfuðstöðvar bankans hafa verið undanfarin 20 ár.

Í tilkynningu frá bankanum segir að lengi hafi legið fyrir að sameina þyrfti starfsemi bankans í nýjum höfuðstöðvum. Þá hafi einnig fundist rakaskemmdir í höfuðstöðvunum á Kirkjusandi og ljóst er að það þurfi að ráðst í miklar endurbætur á húsnæðinu. Viðamiklar rannsóknir hafa staðið yfir á húsnæðinu ásamt því að það hefur verið hreinsað með það að markmiði að lágmarka áhrif á starfsfólk.

Með flutningnum segir bankinn að starfsemi höfuðstöðvanna, sem nú fer fram á fjórum stöðum, verð sameinuð undir einu þaki þar sem 650 starfsmenn munu starfa. Mikil hagkvæmni fylgi sameiningunni en samanlagður fermetrafjöldi höfuðstöðvastarfsemi fer úr 13.900 í 8.600 fermetra í Norðurturninum.

„Við höfum beðið lengi eftir að geta sameinað alla höfuðstöðvastarfsemi bankans á einum stað. Vegna aðstæðna á Kirkjusandi flýtum við þessum áformum okkar og sjáum mikil tækifæri í hinum nýja höfuðstöðvum. Bankinn vill vera framsýnn í starfsemi sinni og við munum nú, undir einu þaki, geta boðið starfsfólki og viðskiptavinum upp á enn betri þjónustu,“ segir Birna Einarsdóttir, bankastjóri Íslandsbanka í tilkynningunni.