Sýningin er afrakstur sjö vikna námskeiðs þar sem nemendur fengu það verkefni að hanna fatalínu úr notuðum fötum í samstarfi við Fatasöfnun Rauða Krossins. Fyrra erindi Misbrigða fór fram í Hörpu 18. mars síðastliðinn, en þá stóðu nemendur fyrir tískusýningu.
Mikilvægi þess að endurnýta verður æ ljósara, enda er slæm staða í umhverfismálum mikið í deiglunni um þessar mundir. Fatahönnunarnemar hafa ekki farið varhluta af þeirri umræðu. Fataiðnaður eins og hann er í dag er gríðarlega ósjálfbær og í mörgum tilvikum ómannúðlegur. Feiknarleg eftirspurn eftir nýjum stílum og miklu úrvali af ódýrum fötum bitnar á gæðum fatnaðarins og aðbúnaði þeirra sem framleiða hann. Sú staðreynd stjórnast ekki síst af neyslumynstri Vesturlandabúa, og þeirri algengu viðleitni að hampa hraða og magni fremur en gæðum.
Það er tímabært að nútíma neytendur endurhugsi fataneyslu sína. Í því felst að þeir læri að sjá gildið í, og hlúi að þeim dýrmætum sem nú þegar eru til, í stað þess að huga eingöngu að því nýjasta, sem svo sannarlega er ekki alltaf það verðmætasta.
Opnun sýningarinnar verður í matsal Listaháskóla Íslands, Þverholti 11, kl: 17:00-20:00. Léttar veitingar í boði og allir velkomnir.
Nemendur sem sýna eru:
Bergur Guðnason
Darren Mark
Guðjón Andri
Hanna Margrét
Kristín Karlsdóttir
Magna Rún
María Árnadóttir
María Nielsen
Signý Gunnarsdóttir
Þóra Ásgeirsdóttir
Leiðbeinendur við verkefnið voru: Katrín María Káradóttir, Dainius Bendikas, Hildur Yeoman og Daníel Björnsson.
