Viðskiptastjóri hjá Íslandsbanka sendur í leyfi vegna ákæru um markaðsmisnotkun

Jónas Guðmundsson, viðskiptastjóri hjá Íslandsbanka, er einn af þeim fimm fyrrverandi starfsmönnum Glitnis sem héraðssaksóknari hefur ákært fyrir markaðsmisnotkun.

Edda Hermannsdóttir, samskiptastjóri Íslandsbanka, segir að Jónas sé kominn í ótímabundið leyfi frá og með deginum í dag vegna málsins og sé það í samræmi við reglur bankans.

„Næstu skref hjá okkur eru að skoða ákæru héraðssaksóknara vel og sjá hvað honum er gefið að sök,“ segir Edda í samtali við Vísi en fyrst var greint frá málinu á vef RÚV.

Auk Jónasar eru þeir Lárus Welding, fyrrverandi forstjóri Glitnis, Jóhannes Baldursson, fyrrverandi framkvæmdastjóri bankans, Valgarð Már Valgarðsson og Pétur Jónsson ákærðir í málinu. Eru þeir allir ákærðir fyrir markaðsmisnotkun en Lárus er einnig ákærður fyrir umboðssvik.