Útboð hins opinbera á flugmiðum kynnt í mánuðinum

Útboð á farmiðakaupum Stjórnarráðsins verður kynnt í þessum mánuði. Þetta verður í fyrsta sinn frá árinu 2011 sem hið opinbera býður út kaup sín á flugferðum.

Frá þessu er greint á vefnum turisti.is í dag. Að því er þar segir, verður nýtt verklag innleitt í kjölfar útboðsins sem felur meðal annars í sér að starfsmaður Stjórnarráðsins verður þjálfaður í bókun farseðla.

Gagnrýnt hefur verið undanfarin misseri að farmiðakaup ríkisins séu ekki boðin út og kærunefnd útboðsmála komst að þeirri niðurstöðu í fyrra að ríkinu bæri að leita tilboða í þau. Í síðasta útboði urðu flugfélögin Icelandair og Iceland Express hlutskörpust en turisti.is telur líklegt að erlend flugfélög sem fljúga hingað til lands gætu tekið þátt í útboðinu að þessu sinni.