Augljóslega ólíkar týpur á yfirborðinu

Ég hef enga reynslu af svona viðburðum en var til í tuskið samstundis og mér bauðst að vera með. Textaskrif eru snilld og hafa haldið mér uppteknum síðastliðinn áratug en upp á síðkastið hefur mig langað til að gera meira. Rappið er rosalega opið form en á sama tíma svo heftandi, ljóð og sögur opna glænýjar víddir sem ég er til í að skoða. Að mínu mati er Andri ein sterkasta rödd okkar tíma og ég veit að margir eru sammála mér um það, og að mitt fyrsta skref í þessum geira sé að gaula við hlið hans er blessun en líka drullufokking absúrd,“ segir Arnar Freyr Frostason sem flestir kannast við úr hljómsveitinni Úlfur Úlfur.

Arnar Freyr rær á ný mið í kvöld en hann hefur undanfarið unnið að ljóðverki ásamt rithöfundinum Andra Snæ Magnasyni sem frumflutt verður á ljóðahátíðinni Óvinir í kvöld. Flestum mun líklega finnast Andri Snær og Arnar Freyr vera ólíklegt teymi en þeir eiga kannski meira sameiginlegt en margan grunar.

„Ég veit ekki hvort nöfnin voru dregin upp úr hatti eða það hafi verið einhver strategía á bak við valið, allavega vorum við Andri paraðir saman og ég er í skýjunum með það, því ég hef lengi litið upp til hans. Við erum augljóslega ólíkar týpur á yfirborðinu en ég leyfi mér að trúa að við séum fremur líkir náungar með ólíkan bakgrunn. Við vinnum báðir með orð en við fáumst einnig við sambærileg efni, sér í lagi samtímann, kosti hans og galla. Munurinn er fyrst og fremst formið og orðavalið. Hann er töluvert fágaðri en ég,“ segir Arnar Freyr.

Andri Snær Magnason hefur fengist við skáldsagnaskrif, leikritagerð, ljóðlist, kvikmyndagerð og aðra hugmyndavinnu undanfarin ár og hafa verk hans hlotið bæði innlendar og alþjóðlegar viðurkenningar. En hvernig líst Andra á samstarfið?

„Samstarfið hefur gengið ótrúlega vel. Ég er mjög hrifinn af því sem Úlfur Úlfur hefur verið að gera og þeir eru fantafínir textasmiðir. Það er alltaf ákveðin kúnst að slípa saman verk þegar menn þekkjast lítið. Þegar leið á samstarf okkar duttum við niður á góða hugmynd, þannig fundum við farveg svo verkið fór að flæða,“ segir Andri Snær Magnason, og bætir við að samstarfsverk þeirra hafi hlotið nafnið Ég er barn, á öxlum barns í síðum frakka.

Framsækið samstarfsverkefni

„Óvinir er samstarfsverkefni ljóðskálda frá Íslandi og Bretlandi, þar sem ljóðskáldin vinna saman í pörum við gerð nýrra verka til upplestrar í London og Reykjavík. Fyrsti viðburður hátíðarinnar fer fram í Iðnó í kvöld. Hátíðin er skipulögð af mér og breska skáldinu Steven J. Fowler. Hann hefur skapað sér sess undanfarin ár sem ákveðinn miðpunktur í avant-garde ljóðasenunni í London og stendur fyrir framsækna verkefninu The Enemies Project. Verkefnið leggur áherslu á getu samstarfs til að draga saman skáldasamfélög og skapa ný og lifandi skáldverk,“ segir Valgerður Þóroddsdóttir, annar skipuleggjandi hátíðarinnar.

Skáldapörin:



Ásta Fanney Sigurðardóttir & Eiríkur Örn Norðdahl

Valgerður Þóroddsdóttir & SJ Fowler

Angela Rawlings & Arngunnur Árnadóttir

Andri Snær Magnason & Arnar Freyr Frostason

Dagur Hjartarson & Soffía Bjarnadóttir

Elías Knörr & Bergþóra Einarsdóttir

Kristín Svava Tómasdóttir & Ragnar Helgi Ólafsson

Sigurbjörg Þrastardóttir & Bergþóra Snæbjörnsdóttir

Anton Helgi Jónsson & Juan Camilo Román Estrada

Kári Tulinius & Halldóra K. Thoroddsen