Bankaráðsmenn axli ábyrgð

Guðlaugur Þór Þórðarson varaformaður fjárlaganefndar Alþingis segir einboðið að bankaráðsmenn Landsbankans axli ábyrgð í Borgunarmálinu hafi bankinn gerst sekur um að ganga gegn eigendastefnu ríkisins. Bankasýslan hefur formlega óskað eftir svörum frá Landsbankanum vegna málsins.

Jón Gunnar Jónsson forstjóri Bankasýslu ríkisins og Lárus Blöndal stjórnarformaður mættu á fund fjárlaganefndar Alþingis í morgun til að ræða sölu Landsbankans á rúmlega þrjátíu prósenta hlut í Borgun. Bankasýslan óskaði í gær eftir svörum frá Landsbankanum vegna málsins. Meðal annars hvernig var staðið að sölunni og hvernig bankinn lagði mat á verðmæti fyrirtækisins.

„Hitt skiptir mjög miklu máli líka að við erum með þennan banka í söluferli. Það er mjög óheppilegt að það komi upp svona mál þegar söluferlið er í undirbúningi og þess vegna göngum við svolítið langt í kröfum um upplýsingagjöf og meðal annars óskum eftir upplýsingum allt til ársins 2009 þannig að við getum alveg sannfært okkur um að það sé allt í lagi í bankanum og rétt staðið að málum," segir Lárus Blöndal formaður stjórnar Bankasýslu ríkisins.

Bankasýslan skipar fulltrúa í bankaráð Landsbankans og getur skipt þeim út ef hún telur að þeir séu ekki að fara eftir eigendastefnu ríkisins. Guðlaugur Þór Þórðarson varaformaður fjárlaganefndar segir að bankaráðsmenn beri þannig endanlega ábyrgð á málinu.

"Bankaráðsmennirnir eiga að fylgja eftir eigendastefnu ríkisins. Það er sú leið sem að við höfum í þessu máli. Ef eitthvað hefur misfarist í þessu máli eða öðrum þá eðli málsins samkvæmt þurfa bankaráðsmenn að bera þá ábyrgð," segir Guðlaugur Þór Þórðarson varaformaður fjárlaganefndar Alþingis.