Facebook var farin að lita hugann

Leikkonan Elma Stefanía Ágústsdóttir hætti nýverið á Facebook. Í dag getur það reynst töluvert átak enda vinsæll miðill sem langflestir landsmenn nota.

„Ég tók þessa ákvörðun fyrir um það bil tveimur mánuðum. Ástæðan var einna helst sú að mér fannst þetta ekki lengur skemmtilegur vettvangur. Mér fannst þessu fylgja of mikið áreiti og langaði að öðlast meiri frið og nýta tímann minn í eitthvað annað,“ segir Elma. Hún stóð sig ítrekað að því að fara inn á Facebook til að kíkja á í raun ekki neitt og fannst það orðið tilgangslaust. „Ætli ég hafi ekki verið að reyna að sporna við frekari athyglisbresti.“

Elma segir fólk fá yfir sig alls kyns skoðanir á Facebook, gjarnan óumbeðið. „Það eru engar síur og svo rúllar þetta í gegnum hugann allan daginn. Mér fannst þetta vera farið að trufla mig og afvegaleiða. Ég var jafnvel hætt að heyra mína eigin rödd. Ég held að miðlar eins og Facebook geti farið að lita hugann, samtöl og í mínu tilfelli listina. Ég vildi einfaldlega skapa meira pláss fyrir sköpun og einhvers konar frumhugsun.“

En nú fer mikið af samskiptum fólks fram í gegnum Facebook. Finnst þér þú vera að missa af einhverju?

„Nei, alls ekki. Vissulega tilheyrði ég einhverjum grúppum þar sem skipst er á upplýsingum en fjarveran hefur ekki háð mér hingað til. Það nota flestir tölvupóst og allt sem skiptir máli tengt vinnunni fer í gegnum hann. Ég held að þessi Facebook-samskipti gefi svolítið falskt öryggi en ég er kannski bara gamaldags. Mér finnst í það minnsta skemmtilegra að hitta fólk augliti til auglitis.“

Aðspurð segir Elma ekki útilokað að hún byrji aftur. „Það er þó ekki á dagskrá.“ Eiginmaður hennar, Mikael Torfason, er líka hættur á Facebook.

Var þetta sameiginleg ákvörðun hjá ykkur hjónunum?

„Ekki beint. Ég tók upp á því að eyða aðganginum mínum einn daginn. Hann hafði verið að hugleiða að gera það sama og lét slag standa. Okkur fannst þetta báðum orðið leiðinlegt. Við erum líka með fullt af krökkum og finnst miklu skemmtilegra að nota tímann í að leika við þau eða lesa góða bók.“

Elma leikur um þessar mundir í Hver er hræddur við Virginiu Woolf í Borgarleikhúsinu sem er sýnt fyrir fullu húsi og hefur fengið góða dóma. Samhliða því er hún við æfingar á Auglýsingu ársins eftir Tyrfing Tyrfingsson sem verður frumsýnt í apríl. „Ég leik dótturina en allir í verkinu eru nafnlausir s.s. leikstjóri, eigandi og kúnni. Þetta er spennandi íslenskt verk eftir einn af fremstu leikhúshöfundum samtímans og verður gaman að koma því á fjalirnar.“