Bjórinn fer í lægra skattþrep

Bjór færist með öðru áfengi úr efra þrepi virðisaukaskatts í það neðra eftir leiðréttingu tollstjóra í gær á tilkynningu sinni frá því á Þorláksmessu um áramótabreytingar á aðflutningsgjöldum.

„Við upptalninguna hefur nú verið bætt þeim tollskrárnúmerum sem innihalda bjór,“ segir á vef tollstjóra.

„Þegar er byrjað að tollafgreiða bjór með 11 prósenta virðisaukaskatti auk þess sem aðflutningsskýrslur vegna innflutnings á bjór frá áramótum hafa verið leiðréttar.“

Vakin var á því athygli í frétt Mbl.is að fjármálaráðuneytið hefði gleymt tollskrárnúmerum sem tengd eru bjór þegar gengið var frá fjáraukalögunum, svonefndum bandormi.

Tollstjóri hefur nú að lokinni skoðun á málinu ákveðið að túlka lögin eftir vilja löggjafans um að allt áfengi ætti um áramót að færast á milli 24 prósenta skattþreps í 11 prósenta þrepið. Með breytingunni var vegið upp á móti hækkun á áfengisgjaldi.