Skrifar bók um strák sem ferðast milli brandara

Hann Dagur Ernisson, sem verður sex ára 17. maí, á heima á Egilsstöðum. Hann hefur sett tvö myndbönd inn á netið sem Dagur dæmalausi.

Hvað er best við að búa á Egilsstöðum, Dagur? Það besta er að ég á hund þar. Svo fer ég stundum út í sveit, þá hjálpa ég afa að gefa kindunum, fer í traktor og klifra á heyrúllum.

Hvað finnst þér skemmtilegast að gera? Að fara í leikskólann minn að leika við bestu vini mína og að gera uppfinningar. Ég er líka oft að föndra, teikna, skoða vísindabækur og gera tilraunir með alls konar.



Ertu dálítill galdramaður? Já, ég hef verið að æfa mig að gera töfrabrögð en ég er líka uppfinningamaður. Hef til dæmis búið til draugavatn, kraftaverkavél og bangsasleða. Ég teikna hugmyndirnar mínar og mamma hjálpar mér að skrifa þegar ég bý til sögur.

Ef þú skrifar bók, um hvað verður hún? Ég er að skrifa bók sem er um uppfinningastrák sem býr til brandara-tímavél. Strákurinn ferðast á milli brandara og sér þá gerast.

Hvað langar þig að gera í framtíðinni? Það er rosalega margt! Þegar ég byrja í skóla í haust langar mig að vera í leikriti og læra á hljóðfæri.

Mig langar að læra meira um risaeðlur og líka klára bókina mína svo aðrir krakkar geti lesið hana.

Ég vil verða bókahöfundur sem fer í þáttinn hjá Gísla Marteini eins og var í jólaþættinum hans, það er uppáhalds fullorðins þátturinn minn.

Ég ætla líka að gera fleiri Youtube-myndbönd og sýna alls konar hugmyndir sem ég fæ og geri.

Það eru svo margar Youtube-rásir á ensku, ég vil búa til íslenska krakkarás.

Hægt er að sjá skemmtileg myndbönd frá Degi dæmalausa á YouTube hér fyrir neðan: