Finni setur hraðaheimsmet á tveimur hjólum

Finnski áhættuökumaðurinn Vesa Kivimaki setti nýverið hraðaheimsmet í akstri bíla á tveimur hjólum. Það eru afar fáir ökumenn sem kunna að aka bíl aðeins á tveimur hjólum, en Vesa tókst að gera það á 186,3 km hraða.

Til þess að þetta hafi verið gerlegt varð Finninn lunkni að hafa skotheld dekk undir bílnum. Það hefur ávallt verið takmarkandi þáttur þegar ekið er á tveimur hjólum, hvort sem um er að ræða metslátt í hraða eða vegalengd því dekkin slitna óheyrilega við að keyra á jöðrum þeirra.

Vesa Kivimaki sagði að hann hefði lengi haft augastað á þessu hraðameti en það sé einfaldlega ekki gerlegt nema hafa svona dekk undir bíl sínum. Það tókst þó að þessu sinni. Vesa leitaði til finnska dekkjaframleiðandan Nokian til að útvega sér dekk sem þyldu þetta álag og Nokian notaði efnið aramid við smíði þeirra, en það er sérlega sterkt efni og þolir hita mjög vel og sérsmíðaði Nokian dekkin fyrir Vesa.

Bíllinn sem Vesa notaði við metsláttinn var BMW 335i Coupe, enda þarf líka að hafa krafta í kögglum til að aka bíl á tveimur dekkjum á 186,3 hraða. Fyrra hraðametið var 181,3 km/klst í eigu Svíans Goran Eliason og var það sett árið 1997. Það var því komið til ára sinna.