Gefast upp á Laundromat draumnum í Laugardal

Kolbeinn Tumi Daðason skrifar 27. október 2016 10:45

Laundromat átti að opna í nyrsta rýminu á Laugarásvegi 1. Vísir/Eyþór

Eigendur atvinnuhúsnæðis við Laugarásveg 1 sem ætluðu að opna fjölskylduvænt kaffihús með þvottaaðstöðu hafa sett húsnæðið á sölu. Viðræður við íbúa í húsinu og eigendur veitingastaðarins Laugaás hafa gengið illa, svo illa að uppgjafartónn er kominn í Laundromat-liða.

Málið er nokkuð sérstakt enda liggur fyrir að húsnæðið er ætlað undir atvinnustarfsemi, almennur áhugi í hverfinu virðist vera fyrir opnun kaffihússins en málið strandar á grænu ljósi frá öðrum í byggingunni svo hægt sé að uppfylla skilyrði byggingarfulltrúans í Reykjavík.

Setja átti upp ramp á þessu horni sem mun ekki ná lengra út frá húsinu en kjallaratröppurnar sem sjást á myndinni. Eigendur Laugaáss telja rampinn munu gera vöruflutningum erfitt fyrir.Mynd/Jóhann Friðrik

Fagna samkeppni en mótmæla

Vísir fjallaði um málið í september þar sem meðal annars var rætt við Guðmund Ragnarsson, eiganda veitingastaðarins Laugaáss, sem sagðist fagna samkeppni í húsið. Þá sagði hann staðinn ekki hafa neinn rétt til að mótmæla opnun veitingastaðarins í húsinu þrátt fyrir að fundargerðir lægju fyrir frá því í sumar þar sem fulltrúi veitingastaðarins lagðist gegn öllum fjórum aðgerðum sem gera þurfti á húsinu.

Aðgerðirnar voru að byggja ramp fyrir fatlaða að aftanverðu, setja loftræstistokk fyrir aftan húsið, koma upp læstum gaskútaskáp og sorpaðstöðu, sömuleiðis aftan við húsið. Þá voru nokkrir íbúar í húsinu mótfallnir opnuninni og vísuðu meðal annars til hávaða frá eldri loftræstistokki hjá Laugaás.

Gert er ráð fyrir atvinnurekstri á fyrstu hæð hússins en á hæðunum tveimur fyrir ofan eru íbúðir. Efnalaug var rekin í lengri tíma í þeim hluta hússins þar sem til stóð að opna kaffihús.

Katrín Atladóttir er einn fjölmargra íbúa í hverfinu sem eru vonsviknir að ekkert verði af opnum kaffihússins.

Íbúar í hverfinu fúlir

Í hópnum Laugarneshverfi á Facebook lýsa íbúar í hverfinu yfir vonbrigðum að ekki hafi tekist að leysa málið. Er vísað í auglýsingu á fasteignavef Vísis þar sem 40 milljónir eru settar á eignina.

„Fúlt! Hefði verið frábær viðbót við hverfið okkar,“ segir Katrín Atladóttir, íbúi í hverfinu. Sumir eru harðorðir í garð eigenda Laugaáss en aðrir segja erfitt að setja sig í spor allra sem komi að málinu.

„Leiðinlegt að fólk hafi ekki náð saman. Minn harmur lýtur bara að því að fá ekki næs kaffihús í götuna. En kannski stekkur bara svipaður rekstur til og holar sér þarna niður innan þess stífa ramma sem hugnast íbúum hússins,“ segir Stefán Hrafn Hagalín, sem býr á Laugarásvegi.

Hallur Dan, einn af eigendum Laundromat, ræddi málið í Brennslunni á FM 957 í morgun. Þar segir hann Laundromat-liða vera að kanna sína stöðu og meta næstu skref.

„Það mun einhver rekstur koma þarna,“ segir Hallur enda hafi það verið tilfellið síðastliðin 50-60 ár.

Viðtalið við Hall Dan má heyra í spilaranum að neðan.

Tengdar fréttir

Mest lesið

Fleiri fréttir