Volvo birtir myndir af V90 Cross Country

Volvo birti í dag fyrstu myndir af þriðja bíl sínum sem ber stafina 90, en þar fer V90 Cross Country sem leysir af hólmi Volvo V70 Cross Country. Volvo V90 Cross Country er upphækkuð útgáfa hins nýútkomna flaggskips Volvo S90 wagon og á að vera færari um að glíma við erfiðar aðstæður.

Bíllinn er fjórhjóladrifinn, með útstandandi brettaköntum og hlífðarplötum að framan og aftan til að verja hann betur í torfærum, allt eins og áður með Cross Country bíla Volvo. Stuðarar bílsins eru aðeins breyttir frá S90 bílnum, en að öðru leiti er bíllinn eins. Bíllinn er eins að innan og verður líklega í boði með sömu vélum.

Volvo hefur ekki gefið upp verð bílsins og má búast við því að hann verði lítillega dýrari en S90 wagon. Eins og eftirspurnin í heiminum er eftir bílum með hærri sætisstöðu má fullt eins búast við að V90 Cross Country seljist betur en S90 bíllinn. Volvo V90 Cross Country fer í framleiðslu í haust og búast má við honum í sýningarsölum Volvo bráðlega.

Þess má geta að ein af þessum fyrstu myndum sem Volvo nú birtir af bílnum er tekin í miðbæ Reykjavíkur, fyrir utan veitingastaðinn Apotek. Volvo V70 Cross Country hefur selst vel hér á landi og ekki við öðru að búast en þessi nýja gerð geri það einnig og margir bíði spenntir eftir að sjá hann í sýningarsal Brimborgar.