Bakkavararbræður kaupa í Bakkavör

Félag í eigu bræðranna Ágústs Guðmundssonar, forstjóra Bakkavarar Group, og Lýðs Guðmundssonar, stjórnarformanns Bakkavarar Group og bandarískra fjárfestingasjóða hefur keypt um 46 prósent hlut BG12 í breska félaginu Bakkavor Group Ltd. 

Þetta kemur fram í frá tilkynningu BG12. Stærstu eigendur BG12 eru Arion banki, Lífeyrissjóður verzlunarmanna, Gildi - lífeyrissjóður ásamt fleiri lífeyrissjóðum og fagfjárfestum. Sameinaði lífeyrissjóðurinn og dótturfélag Klakka selja jafnframt sinn 5% hlut í Bakkavor Group og kaupendur skuldbinda sig til að leggja fram kauptilboð í alla aðra útistandandi hluti í félaginu, rétt um 11%, á sömu kjörum.

Bræðurnir áttu fyrir um 38% í Bakkavor Group. Söluverð hlutar BG12 er rúmir 147 milljónir punda eða 27,4 milljarðar íslenskra króna. Miðað við það er heildarverðmæti hlutafjár Bakkavarar Group um 320 milljónir punda.