Forúthlutun hafin hjá SVFR

Forúthlutun á veiðidögum í laxveiðiánum hjá SVFR er hafin og eftir jafn gott sumar og það sem er að líða verður örugglega mikið af umsóknum.

Veiðin gekk vel í ánum hjá SVFR og þess vegna má reikna með að salan verði mun betri en eftir sumarið 2014, jafnt hjá innlendum sem erlendum veiðimönnum. Forúthlutunin nær þó eingöngu til félagsmanna SVFR og nær til eftirtalinna ársvæða og á ákveðnum dögum.

Langá á Mýrum 24. júní til 16. september. Veiðin í ánni er komin hátt í 2.500 laxa og þar með hefur sumarið toppað veiðina sumarið 1978 þegar 2405 laxar veiddust og er yfirstandandi sumar þar með orðið það þriðja besta í ánni frá 1974. Áin var aðeins veidd á flugu í sumar og verður einnig næsta sumar.

Hítará 30. júní til 27. ágúst. Hítará er geysilega vinsæl meðal félagsmanna SVFR og það komast færri í hana en vilja enda er aðeins veitt á 6 stangir í henni. Hún fer nálægt 1.300 löxum í sumar sem er eitt af hennar allra bestu árum.

Haukadalsá 30. júní til 27.ágúst. Haukadalsá átti frábært sumar eins og flestar árnar á vesturlandi en hún endaði í 650 löxum.

Leirvogsá 2. júlí til 10. ágúst. 669 laxar hafa verið færðir til bókar á stangirnar tvær í Leirvogsá sem gerir ána að einni aflahæstu pr. stöng á landinu.

Silungasvæðin í Laxá eru einnig í þessari forúthlutun. Félagsmenn SVFR hafa til 15. október til að sækja um ó forúthlutun félagsins.