Spá 3,8 prósenta verðbólgu á næsta ári

Samkvæmt nýrri spá hagdeildar ASÍ má gera ráð fyrir 3,8 prósenta verðbólgu árið 2016.

Hún verði svo 3,5 prósent árið 2017. Hagdeildin spáir því að umsvif í hagkerfinu muni vaxa hratt á næstu árum, verðbólga muni fara yfir markmið Seðlabankans og hætta á ofhitnun í hagkerfinu muni aukast gangi spáin eftir.

Samkvæmt spánni verður góður hagvöxtur næstu tvö árin. Hagvöxturinn verður drifinn áfram af vexti þjóðarútgjalda, þar sem einkaneysla og fjárfestingar vaxa mikið og gangi spáin eftir fara fjárfestingar yfir 20 prósent af landsframleiðslu á spátímanum. ASÍ spáir 4,3 prósenta aukningu í landsframleiðslu árið 2015, 4,1 prósents aukningu árið 2016 og 3,3 prósenta árið 2017.

ASÍ telur mikilvægt við núverandi stöðu í hagkerfinu að ríki og sveitarfélög sýni aðhald í rekstri en sú sé ekki raunin. Mikilvægt sé að rjúfa þann vítahring að hver hópur á vinnumarkaði hafi farið fram og reynt að rétta sinn hlut óháð því hvaða áhrif slíkt hefði á aðra hópa eða hagkerfið. Jafna þarf stöðu ólíkra hópa á vinnumarkaði og vinna að því að launahækkanir samræmist efnahagslegum stöðugleika til lengri tíma.

Spá ASÍ byggist á þeirri forsendu að það takist, ef ekki verða verðbólguhorfur mun lakari en í spánni.

Spáin gerir ráð fyrir að atvinnuleysi verði 3,1 prósent 2015, þrjú prósent 2016 og 2,9 prósent 2017. Einnig er spáð áframhaldandi fjölgun ferðamanna hér á landi. Því er ólíklegt að innlent vinnuafl geti að öllu leyti mætt aukinni eftir­spurn eftir vinnuafli. Til dæmis í mannvirkjagerð og ferðaþjónustu.