Fara Clarkson, Hammond og May á Netflix eða ITV

Breska götublaðið Daily Mirror greinir frá því að Top Gear þríeykið sé nú að undirbúa gerð bílaþáttar sem aðeins yrði aðgengilegur á Netflix og að hann muni bera nafnið House of Cars. Taka má slíkum fréttum með nokkrum fyrirvara en Daily Mirror þykir ekki ábyggilegast dagblaða í fréttaflutningi í Bretlandi.

Nýlega hefur reyndar sést til þremenninganna á tali við framkvæmdastjóra ITV sjónvarpsstöðvarinnar og gæti það bent til þess að verið sé að finna flöt á sjónvarpsþáttagerð þeirra um bíla á ITV.

Sumir hafa bent á það að ITV sjónvarpsstöðin hafi mestar sínar tekjur af auglýsingum og það gæti reynst erfitt fyrir Jeremy Clarkson og í raun þá alla þrjá að tala niður ákveðna bíla eða bílamerki sem auglýsa á stöðinni. Þeir verði illa hamdir á þeim vettvangi og ef að þeir fái ekki að koma skoðunum sínum á framfæri á sama hátt og áður verði skemmtangildi þáttanna minna.